Menu Xerais

Herta Müller recibirá o Nobel o 10 de decembro

Moi interesantes son as declaracións realizadas en Estocolmo por Herta Müller, días antes da cerimonia de entrega do Premio Nobel de Literatura. A escritora alemá, de nacionalidade romanesa e pertencente á minoría suaba, síntese «filla do desarraigamento»: “A miña casa era a miña casa, pero se es perseguida, se estás asustada, non tes sensación de fogar” explicou. A vida dunha familia como a súa que espera en Romanía os visados para trasladarse a Alemaña quedou plasmada maxistralmente en O home é un grande faisán no mundo, novela traducida por Franck Meyer e publicada por Xerais na serie «As Literatas» dirixida por María Xosé Queizán.

No espazo web da Academia Sueca pode baixarse en pdf o discurso («Cada palabra sabe algo sobre o círculo vicioso») que lerá Herta Müller na cerimonia oficial de entrega dos Premios Nobel, que se celebrará o próximo 10 de decembro, coindicindo co aniversario da morte do seu fundador, Alfred Nobel.

Na primavera vindeira aparecerá en Xerais Narrativa, coincidindo coa súa publicación en castelán e catalán, a máis recente novela de Herta Müller, Atemschaukel, traducida do alemán por Marga Romero. A novela, cualificada por algúns críticos alemáns como obra mestra, está protagonizda por leo, un mozo de dezasete anos, que narra os cinco anos de inferno que pasou nun campo de traballo soviético.

Comentarios pechados