Menu Xerais

Novidade: «A semente, á árbore, a froita», de María Reimóndez. O achegamento dunha escritora á figura dunha muller pública para atopar, a través da palabra, a súa exacta dimensión

A semente, á árbore, a froita, de María Reimóndez, é unha novidade da colección Crónica de Xerais.

É difícil que haxa alguén que non escoitase falar nos últimos tempos do “efecto Pontón”. En boa medida, o efecto explícase pola chegada ao liderado do BNG dunha muller nova, con moitos anos de dedicación política ás súas costas, que levou o partido a experimentar unha importante recuperación cun discurso renovado.

Este libro é o froito dunha longa conversa entre dúas mulleres, unha conversa demorada e, segundo María Reimóndez, “pode que por momentos incómoda”, que nos axuda a comprender quen é Ana Pontón abordando a súa dimensión política dende unha perspectiva íntima, confesional e persoal.

Reimóndez, que se achega aos partidos (confesa no limiar) con reticencia e curiosidade, percibe na figura de Ana Pontón a sororidade das mulleres galegas que buscan transformar a sociedade desde o ensino, a ecoloxía, a escrita, a arte, o mundo laboral e científico e tamén dende a política. E transmítenolo cunha ollada, naturalmente, comprometida.

Tras décadas de intenso labor parlamentario e un bo coñecemento da realidade galega, Ana Pontón lidera unha organización coma o BNG. Pero quen é realmente Ana Pontón?

“A semente, a árbore, a froita” non é tanto un libro de actualidade como o achegamento dunha escritora á figura dunha muller pública para atopar, a través da palabra, a súa exacta dimensión.

Deixa un comentario!