Menu Xerais

O «Dicionario Xurídico Galego» é recoñecido co premio Lois Peña Novo

O Dicionario Xurídico Galego, editado por Xerais e do que son autores Luciano Varela Castro e Xosé Xoán Barreiro Prado, foi recoñecido onte pola Fundación Lois Peña Novo co premio que leva o nome deste galeguista. Os galardóns entregaranse o vindeiro 27 de xuño no castelo de Soutomaior e recoñecen o traballo a prol da normalización do galego «nas administracións públicas, na vida institucional de Galicia e na sociedade en xeral». Canda a este traballo, tamén levaron premios Luís Villares, maxistrado de Lugo, e o policía local de redondela Gonzalo Amoedo.

O Dicionario Xurídico Galego recolle unha primeira e fundamental escolma de entradas (arredor de 2.000) nas que se presentan en galego normativo conceptos esenciais do Dereito, información crítica sobre a lexislación vixente en España e, de xeito especial, termos e institucións propias do Dereito Civil de Galicia.A obra foi redactada, baixo a coordinación de Luciano Varela Castro e Xosé Xoán Barreiro Prado, por 120 autoras e autores, organizados nas áreas de Dereito Administrativo, Dereito Civil común e de Galicia, Dereito do Traballo e da Seguridade Social, Financeiro e Tributario, Internacional, Mercantil, Notarial e Rexistral, Penal, Procesual e Teoría do Dereito e Dereito Constitucional.Este Dicionario, coeditado por Xerais e a Xunta de Galicia, e que contou coa colaboración de Rexurga (Revista Xurídica Galega), pretende, en palabras de LucianoVarela, ser «útil para se entender entre eles, cando menos, os que traballan no ámbito xurídico, sen perda do significado especializado dos termos nin do sentido dos enunciados usados nos escritos e conversas».

Comentarios pechados